5.Mai bis 25.Mai Townsville nach Byron Bay

Für mich isch d‘Ost Küste natürlich nüüt meh neus gsi :) do ich mit de Kathrin und de Ryoko au scho einiges do bereist han. Dä Lukas und ich händ es paar schöni Täg uf Magnatic Island verbrocht. Was mich sehr gfreut hät isch, dass mir drüü wildi Koalabäre entdeckt händ. Das sind mini erste wilde Koalabäre wo ich in Australie gseh han!!
Mir sind 2Nächt und 2Täg ufemene Katamaran i de Whitsundays gsi und sind go tauche. Es sind zwei wunderschöni Tauchgäng gsi und mir händ en Hufe kunterbunti, grossi, chlini und au gfürchigi Fisch gseh. Noch dä Whitsundays sind mir in 1770 as Great Barrier Reef go schnorchle. Wow, das isch dä absoluti Hit gsi. Ich glaube, detä händ mir jedä Fisch gseh wos git und ä wunderschöni Korallelandschaft. Bsundrigs händ eus d‘Schildkrote gfalle. Mir händ einigi gseh und händ diä au in ruhe chönä beobachte. De Nemo hät bi dem Schnorchelgang natürlich au nid gfählt ;)
A de Sunshine Coust händ mir eus schön Ziit gnoh und händ Badeferiä gmacht. A Brisbane verbi sind mir ad Gold Coust, au detä händ mirs eus guet go loh und händ Badeferiä gmacht und händ in Surfers Paradies immene 4Sterne Hotel gnächtiget :) Chli nervös bini denn aber doch gsi, als mir richtig Byron Bay gfahre sind. Aber d`Freud isch grösser gsi :) Mir sind uf en Campingplatz und händ eus grad mol für vier Nächt detä iquartiert. Natürlich bin ich alli mini Lieblingsplätz nomol go bsueche. Leider isch es Wetter typisch Byron Bay gsi, starche Rägä mit Sunneschii gmischt. Chälter isches au in Byron Bay worde, mir sind den aber glich is Meer go surfe :) Ich han d‘Ziit in Byron Bay nomol so richtig gnosse, denn vilicht isch es jo es letschte mol wo i mis Lieblingsplätzli in Australie wird gseh. De Abschid isch drum um so schwiriger gsi. Zum Glück hät mä no en Hufe Erinnerige im Chopf und als Föteli :) Euses letste Ziel, bevors wieder richtig Heimat got, isch Brisbane. Aber bevor mir in Brisbane a cho sind, sind mir nomol ä Nacht in Surfers Paradies gsi. Eusi letstä 4Täg händ mir in Brisbane verbrocht. Es Wetter isch herlich warm gsi und mir händ es Big City Live gnosse :)

29.April bis 4.Mai 2010 Outback

Euses Outback Abentüür hät demit agfange, dass mir eus mit viil food und Wasser ideckt händ. Damit mir im Fall vonere Panne nid mösstet verdurste oder verhungere :) Was aber natürlich niä iträttä isch ;) Mir händ eusi Reiseroute guet „gstudiert“ und händ eus Tankstelle markiert. Mir sind sehr neugirig uf diä Australischi Wüesti gsi. Mir händ aber au gwüsst, dass mir bestimmt 3Täg bruchet bis mir bim Uluru Kata Tjuta National Park achömet. Eusi Fahrt isch also los gange. Mit de Ziit isch de Verchehr immer ruhiger worde, am Strosserand händ sich dHüser i Strücher oder Bäum verwandlet, dStrosse sind au immer weniger worde, bis mir nur no uf dä eine grade, grade, grade, Stross is Outback gfahre sind. Diä Australischi Wüesti hät sich allerdings sehr grüen präsentiert. Nix gsi mit nur rote Erde, so wiä ich mir das Vorgstellt han!!! Allerdings hätt`s es paar Täg zuvor grägnet, so wiä eus das en liebe Tankwart verzellt hät. Eusen erste Übernachtigsstopp isch in Coober Pedy gsi. Mir sind sehr neugirig gsi uf das Coober Pedy, denn diä Opalstadt segi eini vo de seltsamste Plätz in Australiä. Aboriginals händ de Ort kupa piti (=weisser Mann im Loch) gnennt. Diä meiste Bewohner sind Opalarbeiter und wohnet in unterirdische Wohnhöhle, zum Schutz vor glühender Hitz. Typisch für diä chli Stadt sind so Muulwurshügel, wo durch diä viele Opalmine entstönd. Was gar nid so ungföhrlich isch, denn die Löcher sind sehr tüüf und werdet nüme ufgfüllt. Aber Warnschilder wiiset eim drufhii ;)
Am nöchste Tag isches denn frühe uf de gliche grade Stross wiiters gange. Mir händ recht Gas geh, denn am frühne Obig sind mir am Uluru a cho!! Wow, isch echt super idrücklich gsi, wenn noch sonere lange Fahrt wo mä lediglich d‘Stross, ab und zue mol es Auto, ab und zue mol ä Tankstell, Bäum und Strücher gseht, plötzlich de Uluru vor eim uftaucht! De Uluru isch 348m hoch und 3,4km lang. De Ufstig uf de heiligi Felsä isch bi dä Aboriginals Tabu. Wer de Aboriginals Respekt möchti erwiise, chläteret nid uä… Hmmm Sorry liebi Uriwohner, aber ihr verpasset was!!! De Ufstig isch zwor recht steil, recht streng und duret ca. 1h, aber de Usblick vo Obe isch eifach super!! 2Täg spöter han ich defür extreme, sehr schmerzhafte Muskelkater gah!!! Richtig uf de Sunneuntergang händ mir es Plätzli im Sunset Viewing Area gfunde und händ es Farbespiel vom Uluru und de Sunne dörfe gnüsse. Mir händ im sehr nöchligende Yulara Resort im Büsli übernachtet. Am nöchste Tag sind mir no zu de Kata Tjuta, händ es paar pictures gmacht und sind den wiiters zum Kings Canyon. Dä Kings Canyon isch di grössti und bizarrsti Schlucht in Australie. Mir sind den uf e churzi Wanderig durch de Canyon. Phuu… wiä scho bim Uluru isch es extrem Heiss gsi (ka Ahnig wiä mä das alles im Summer chan freiwillig bsuche!!). Flüge hätt`s au en Hufe gha, aber es isch sehr erträglich gsi für mich, denn irgendwiä händ sie de Lukas lieber gha ;)
Am Obig sind mir in Alice Springs go übernachte. Dä Tag druf sind mir no ad Todd Mall, das isch d‘Fuessgängerzone. Mir händ grad no en Fiirtig verwütscht und händ enere Parade dörfe zueluge. Mir händ eus wieder chli ideckt mit Trinke und Esse und sind am Mittag den wiiters. Euses Ziel isch d‘Ost Küste Townsville gsi. Mir händ mit ca 3Täg reiner Fahrt grächnet. Mir sind einisch meh einigi hunderti Kilometer täglich gfahre. Ab und zue en stop zum tanke. A de Devils Marbels sind aber natürlich au mir nid eifach verbii gfahre. Do liget hunderti gigantischi Felschugle umenand und ufenand. Sehr idrücklich gsi!! Uf dere Strecki händ mir nur no Campiert und i eusem Büsli pfuset. Scho fast en Kulturschock händ mir erlitte, wos wieder chli meh Verchehr geh hät und einigi Strosse dezuä cho sind, Bäum sich wieder in Hüser verwandled händ, en hufe Tankstell und ein Shop noch em andere uftaucht sind. Noch 2 ½ Täg sind mir im tropische Townsville a cho und mir händ eus risig uf Meer und Strand gfreut ;)!

28.April bis 29.April Greate Ocean Route nach Adelaide

Über Greate Ocean Route sind mir noch Adelaide gfahre. Greate Ocean Route isch wunderschön, mir händ sie zwor bi Sturm und Rege dörfe erläbä, aber vilicht genau wägä dem isch sie so idrücklich gsi und jetzt wüsset mir warum Greate Ocean Route au Schiffs-Wrack-Küste gnennt wird. Durchnässt isches den wiiter gangä uf fahrt noch Adelaide. Mir händ nur en churze stop in Adelaide gmacht, händ City chli a glueget und sind den wiiters is Outback.

25.April bis 27.April Melbourne

Am 25. April händ mir eusen Camper in Sydney abgolt und sind uf de Grand Pacific Drive in Süde vo Australie greist. Zwei Täg händ mir brucht bis mir a eusem Ziel Melbourne a cho sind. Leider isch im Süde grad Winter, drum isch es zimlich chalt gsi (han nur 1langi Legins debi gha!!!). In Melbourne hätts denn no dezuä grägnet. Drum isch Stadtbesichtigung zimlich churz gsi. Mir sind zum 285m höche Eureka Skydeck. Mir händ en super schöne und wiite Usblick uf Melbourne gha. Sodemit händ mir alles vo Melbourne gseh was meh chan gseh :)

17. bis 24.April 2010 Sydney

I love Sydney :) Sydney isch würklich ganz e super schöni City! I dene 8Täg wo ich in Sydney gsi bin, hani natürlich einiges erlebt und einiges gseh. Natürlich sind mir as Opera House und mir sind über Harbour Bridge glofe. Es Panorama vo de Fähre us, mit Skyline, Opera House und Harbour Bridge isch eifach einzigartig und wunderschön gsi!!! Ruhe und Entspannig hend mir im Royal Botanic Garden gfunde. Unterhalb vo de Harbour Bridge isch es Viertel The Rocks. Detä hät`s en hufe Läde, Cafe`s und Restaurant. Sydney hät es grösste Aquarium vo de Welt. Hani natürlich muesse goh :) Mir händ en hufe Fisch gseh, hehe was au süscht imene Aquarium. Aber es coole isch gsi, dass mir durch en Gang händ chöne laufe und über üs sind Haie, Roche, Wasserschildkrote und und und gschwumme.
Was nid dörf fähle, isch en Bsuech am Bondi Beach. Mir händ super Wetter gah in Sydney, drum sind mir grad mol wieder go sünnele und go bädelä am berühmt berüchtigte Bondi Beach. Shopping isch also au super detä :)
En ganze Tag händ mir in Manly verbrocht. Isch en Vorort vo Sydney wo mä mit de Fähre erreiche chan. Einisch meh sind mir detä go sünnele und go bädele und mir händ en chline walk is chline „Gebirge“ gmacht. Mir sind belohnt worde mitere wunderschöne Ussicht ufs Meer und uf Manly.
Sydney hät en riiisige Zoo. Au vo do us isch d`Ussicht uf City Sydney eifach super. Aber natürlich sind Tier im Vordergrund gstande! Vo ganz normale Tier, wie Hühner, bis lustige und komische Tier (leider alli Tiernäme vergässe), findet mä detä. Alli Tier händ mir aber nid gseh, do de Zoo eifach zu gross isch und mir leider ka Ziit meh gah händ.
Mir händ au no en Tagesusflug id Blue Mountens gmacht. Mir händ die Felsformation Three Sisters bewunderet und sind zwei Stund i de Blue Mountens go wandere, mit de Flip Flops… Isch also super guet gange!!! :) Die Wiite vo de Blue Mountens isch sehr idrücklich gsi, eigentlich hät mä gar kas Endi gseh.
Min Geburi hani in Sydney gfiret. Leider isch nüüt worde mit Usschlofe, do i e grosses Geburigschenk han dörfe abhole… Hehe de Lukas isch in Sydney a cho. Do bini natürlich sehr gern früh ufgstande und bin ihn am Flughafe go abhole. Zwei Täg lang bin ich de Turiführer gsi und han ihm Sydney zeiget :)

13. bis 16.April 2010 Cairns

In Cairns händ mir zwei Tagesusflüg gmacht, de Cape Tribulation Trip und mir sind as Great Barrier Reef go schnorchle.
Leider hät`s am Tag wo mir uf de Cape Tribulation Trip gange sind gregnet. Mir sind mit em Böötli durch en River gfahre und händ detä Krokodil und Schlange gseh. Mir sind durch de Regewald glofe und mir hettet zum Abschluss no chöne imene Flüssli go bädele. Hehe, aber nass sind mir jo scho gsi vo dem Rege und drum händ mir es bädele sii loh:) Jo also das wäris scho gsi zu dem Trip. Würklich super isch de nid gsi, aber immer hin hend mir zwei Babykrokodil gseh, ei Schlange und en hufe Spinne!!!
Spannender und schöner isch defür es schnorchle am Great Barrier Reef gsi. Mit grossem Wellegang sind mir mit em Böötli zu eusem Reef gfahre. Isch würklich sehr idrücklich und wunderschön gsi was mir unter Wasser alles gseh händ. Kunterbunti Fisch und e wunderschöni Unterwasserwelt!!
Cairns selber händ mir nid würklich besichtiget. Mir hend dringend en relax day brucht noch drei Wuche reise :)

Magnetic Island, 11.April bis 13. April

Magnetic Island! Hot hot hot!!! Ok han do min erstä Sunnebrand gholt, Kathrin isch fast kollabiert, Ryoko isch immer no im take a pictuer fieber :D A eusem erstä Tag händ mir eus eifach mol chli im Backpackers erholt. Am zweite Tag händ mir eus en pinkä coolä chlinä Caprio-Flitzer gmietet. Mir sind durch diä ganz halib Insle düset. Isch eifach nume fun pur gsi!! Mir händ än forest walk gmacht i dä hoffnig wildi Koalas zgseh. Hämer leider nid!! Aber defür hunderti wunderschöni Schmetterling, diä über üsi Chöpf gfloge sind. Isch echt ä super Bild gsi. So öppis händ mir alli no niä gseh… Ä soooo viil Schmetterling uf eim Hufä!!! Noch dem walk sind mir an Horseshoe Bay gfahre. Mir sind chli go bade, händ gsünnelet. Aber irgendwie händ mir doch mol wieder chli action brucht ;) Also händ mir ä super cooli lustigi fahrt ufem Meer gmacht. Do mir alli nüme wüsset wiäs uf dütsch oder englisch heisst, beschribet mir das ganze mol: mir sind alli i eim mini Schluchboot ghocket, händ eus gaaaanz fest muesse hebä und ä grosses Boot hät voll speed geh und isch mit eus übers Meer düset!! Fun, fun fun!!! Am spötere Mittag sind mir no Wallabies go a luege. Süessi chlini Dinger!! Mir händ eusen pinkä Liebling muässä abgeh und händ den müässä hei laufä (1 ganzi stund), it was so hot hot hot!!! Mir händ sogar ä Vatermorgana gseh!!! Entlich i eusem Backpackers a cho, händ mir eusi Vermieterin vom Auto a troffä!! Händ mir gwätteret, diä het eus jo au chöne mitneh!! Naja, eusere Figur hätts sicher mol nid gschadet!!